“Əlilliyi olan şəxslərə sosial dəstək” ictimai birliyi və İBİS SİTY HOTEL-in birgə əməkdaşlığı ilə “Bizimlə öyrən” adlı təlimin ikinci mərhələsi baş tutub. Layihənin təşəbbüskarı birliyin könüllülər komandasının rəhbəri, Qərbi Kaspi Universitetinin tələbəsi Lamiyə Miriyeva, birliyin əsas məqsədlərindən biri olan əlilliyi olan gənclərin təhsil almasına dəstək vermək, biliklərini gücləndirmək, sosiallaşmalarını stimullaşdırmaq və cəmiyyətə inteqrasiyasını artırmaq məqsədilə "Bizimlə öyrən!" adlı layihəni həyata keçirməyə başlayıb.
Layihəyə 20-yə yaxın fiziki məhdudiyyətli gənc qoşulub. "Bizimlə öyrən!" layihəsinin əsas məqsədi gənclər arasında ingilis dilinin inkişaf etdirilməsidir. İngilis dilində mükəmməl biliklərə sahib könüllü komanda layihənin təlimlərini həyata keçirir, iştirakçılar arasında ingilis dilində sorğu-sual aparır, səlis cümlə qurmağı və ingilis dilində fikir bildirməyi öyrədir. Təlimin sonunda iştirakçı gənclərə sertifikat təqdim olunub. Bu cür təlimlərin icrası gənclərdə ruh yüksəkliyinə və öz güvəninə səbəb olur.
Layihəyə dəstək verdiyinə görə İBİS SİTY HOTEL-in direktoru Beifordt Konstantinə, İnsan resursları üzrə meneceri Nərgiz Məcidovaya və Tədbirlər üzrə mütəxəssis Sara Rzayevaya təşəkkürümüzü bildiririk.
