Martın 14-də Bakı Slavyan Universitetində (BSU) mart ayı üzrə “İnklüziv təhsil həftəsi“ çərçivəsində xüsusi qayğıya ehtiyacı olan gənclərin rəsm və əl işlərindən ibarət sərgi-satış yarmarkası keçirilib. Yarmarkada əlilliyi olan uşaq və gənclərin rəsm, toxuma və digər işləri nümayiş etdirilib. BSU-nun rektoru Anar Nağıyev sərgi-satış yarmarkasında nümayiş olunan rəsm və əl işlərini yüksək qiymətləndirərək gənclərə təşəkkür edib və onlara gələcək fəaliyyətlərində uğurlar arzulayıb. Rektor Anar Nağıyev "Əlilliyi olan şəxslərə sosial dəstək" ictimai birliyinin sədri Təranə Musayeva ilə söhbət edərək birliyin fəaliyyəti ilə maraqlanıb. Sonra BSU-nun rəhbərliyi, struktur bölmələrinin nümayəndələri, professor-müəllim heyəti və tələbələri yarmarkaya baxış keçiriblər.
Sərgi-satış yarmarkası gənclərin yaradıcılığını və bacarıqlarını təqdim etmələrinə şərait yaratmaq, həmçinin inklüziv təhsilin inkişafına dəstək vermək məqsədilə təşkil edilib.
