“İstedad sərhəd tanımır – Mən də varam” layihəsi çərçivəsində sosial-mədəni tədbir keçirilib

Bakı, 6 iyun 2026-cı il – “Əlilliyi olan Şəxslərə Sosial Dəstək” İctimai Birliyi tərəfindən həyata keçirilən “İstedad sərhəd tanımır – Mən də varam” layihəsinin davamı olaraq genişmiqyaslı sosial-mədəni tədbir təşkil olunub. Tədbir 1 İyun – Uşaqların Beynəlxalq Müdafiəsi Gününə həsr edilib.

Tədbirin əsas məqsədi əlilliyi olan uşaq və gənclərin istedadlarının üzə çıxarılması, onların sosial fəallığının artırılması, cəmiyyətə inteqrasiyasına dəstək göstərilməsi və inklüziv dəyərlərin təşviq olunmasıdır.

Tədbir Azərbaycan Respublikasının Dövlət Himninin səsləndirilməsi ilə başlayıb. Ardınca Vətən uğrunda canlarını fəda etmiş şəhidlərin əziz xatirəsi bir dəqiqəlik sükutla yad edilib.

Tədbirdə çıxış edən “Əlilliyi olan Şəxslərə Sosial Dəstək” İctimai Birliyinin sədri Təranə Musayeva qonaqları salamlayaraq layihənin əhəmiyyətindən bəhs edib, iştirakçılara uğurlar arzulayıb. O, əlilliyi olan şəxslərin cəmiyyət həyatında fəal iştirakının təmin edilməsinin vacibliyini vurğulayıb.

Tədbirin bədii hissəsi “Mən də bu şəhərin bir parçasıyam” adlı tamaşa ilə başlayıb. Tamaşa vasitəsilə inklüziv cəmiyyətin formalaşdırılması, bərabər imkanların yaradılması və sosial həmrəyliyin gücləndirilməsi ilə bağlı mühüm mesajlar iştirakçılara çatdırılıb.

Tədbir çərçivəsində əlilliyi olan uşaq və gənclər müxtəlif musiqi, rəqs və digər maraqlı konsert nömrələri ilə çıxış edərək öz bacarıq və istedadlarını nümayiş etdiriblər. İştirakçıların çıxışları tamaşaçılar tərəfindən böyük maraq və gurultulu alqışlarla qarşılanıb.

Tədbirin əsas hədəflərindən biri əlilliyi olan uşaq və gənclərin cəmiyyət həyatında fəal iştirakının vacibliyinə diqqət çəkmək, onların potensialını daha geniş auditoriyaya təqdim etmək və inklüziv dəyərlərin təşviqinə töhfə vermək olub.

Tədbirdə Azərbaycan Respublikası Milli Məclisinin deputatı Vüqar İsgəndərov, ictimaiyyət nümayəndələri, dövlət qurumlarının təmsilçiləri, qeyri-hökumət təşkilatlarının nümayəndələri, media mənsubları və digər qonaqlar iştirak ediblər.

Tədbirin sonunda iştirakçılarla xatirə şəkilləri çəkdirilib və layihənin gələcək mərhələləri ilə bağlı məlumat verilib.